���ӰԺ

Aeth y cyn-fyfyriwr Dr Alan Crofts, a fu’n fyfyriwr israddedig biocemeg ym Mangor, ymlaen i chwilio am antur ar ôl gadael y Brifysgol yn 1990.

Ag yntau â diddordeb mewn anialdiroedd ers ei blentyndod, trefnodd Alan ei alldaith annibynnol cyntaf yn 1995 a chroesi anialwch Gorllewin y Sahara o'r Gogledd i'r De (trwy Mauritania a Gorllewin y Sahara). Ers hynny, a chan fanteisio ar y sgiliau a ddysgodd fel Swyddog Cudd-wybodaeth yn yr Awyrlu Brenhinol, trefnodd a chymryd rhan mewn nifer o alldeithiau arloesol annibynnol ar draws y byd yn ogystal â chymryd rhan mewn rhaglen ‘goroesi mewn anialwch’ yn yr Iorddonen a gynhaliwyd gan y Môr-filwyr Brenhinol. Noddwyd ef gan ddiwydiant i ddod o hyd i lwybrau a ffynonellau dŵr ar draws Dwyrain y Sahara a’r Kyzl Kum yng Nghanolbarth Asia. Mae Alan yn Gymrawd y Gymdeithas Ddaearyddol Frenhinol ac wedi traddodi cyflwyniadau ar sawl achlysur yng ngweithdy'r anialwch cyngres ‘Explore’ flynyddol y Gymdeithas.

Ym mis Mai 2024, bydd Alan yn arwain tîm o chwech i groesi anialwch y Nefud yng Ngogledd Sawdi-Arabia trwy arloesi llwybr newydd ar draws y diriogaeth gras, anghysbell ac eang hon. Mae tîm “Taro Einion yr Haul” Nefud 2024 yn bwriadu bod y cyntaf i ddangos y gellir defnyddio pŵer amgen fel opsiwn hyfyw ar gyfer y cerbydau alldaith fydd yn cludo’r tîm, y cyflenwadau a’r offer ar draws y dirwedd arw, heriol hon. Yn ogystal â defnyddio'r dechnoleg ddiweddaraf i bweru offer, mae'r tîm yn bwriadu defnyddio cerbydau wedi’u pweru gan drydan a biodanwydd i liniaru ôl troed carbon yr alldaith. Hwn fydd y tro cyntaf i ddiffeithwch anghysbell gael ei groesi gan ddefnyddio strategaeth arbed carbon gynhwysfawr.

Disgwylir i’r tîm gymryd tair wythnos i gwblhau'r llwybr o Ha'il i Ar'ar, sydd oddeutu 700km drwy anialwch o dywod symudol. Mae “Einion yr Haul” yn ardal yng ngogledd-orllewin Nefud lle mae'r haul yn curo'n ddi-baid ar wastadedd enfawr o dywod gwyn. Oherwydd y gwres, y llacharedd a’r diffyg dŵr, mae’r Bedowiniaid lleol yn ystyried yr Einion yn amhosibl i’w chroesi â chamel yn ystod golau dydd. Nodweddir yr ardal anghysbell, gyfriniol hon gan ritholygfeydd (‘mirages’) a'r cythreuliaid tywod sy’n cael eu codi o'r tir gan awelon.

Mae’r tîm yn cefnogi elusen y Deyrnas Unedig, “Action for Stammering Children”. Mae’r alldaith wedi’i chofnodi gan y Gymdeithas Ddaearyddol Frenhinol ac mae ganddi gefnogaeth lawn gan Lysgenhadaeth y Deyrnas Unedig yn Riyadh, Sawdi-Arabia a chan ei Uchelder Brenhinol, y Tywysog Khalid, llysgennad Sawdi-Arabia i’r Deyrnas Unedig.

Gwerthfawrogodd Alan ei gyfnod ym Mangor ac yn arbennig felly’r adran biocemeg ac aeth ymlaen i ennill PhD yn Efrog cyn dilyn astudiaethau ôl-ddoethurol yn Baltimore UDA.

Ceir rhagor o fanylion am yr alldaith yn:

Neu anfonwch e-bost at Alan yn alancrofts928@icloud.com

��