¿ì»îÓ°Ôº

Mae astudio cyfrifeg, bancio a chyllid yn arfogi myfyrwyr ag ystod eang o sgiliau arbenigol y mae galw mawr amdanynt gan y prif gyflogwyr. Mae graddau mewn cyfrifeg, bancio a chyllid yn rhoi'r gallu i fyfyrwyr ddehongli a chyfathrebu gwybodaeth ariannol, a gwneud penderfyniadau ariannol cadarn. Caiff y sgiliau hyn eu gwerthfawrogi'n fawr a gellir eu cymhwyso mewn unrhyw ddiwydiant busnes neu sefydliad nid-er-elw (e.e., y sector cyhoeddus neu elusennau). Mae arbenigedd ariannol yn fawr ei barch yn y farchnad swyddi heddiw ac mae'n ddefnyddiol ar gyfer gyrfaoedd mewn llawer o wahanol sectorau.

Mae cyflogadwyedd wrth galon ein rhaglenni. Mewn sawl modiwl rhoddir cyfle i fyfyrwyr ddatblygu sgiliau meddal ac ymarfer technegau recriwtio a dethol go iawn. Mae cyn-raddedigion cyfrifeg, bancio a chyllid ym Mangor wedi mynd ymlaen i ddilyn gyrfaoedd sy’n rhoi boddhad ariannol mewn sawl diwydiant gwahanol.

Mae ein graddau nid yn unig yn eich arfogi â dealltwriaeth ddamcaniaethol gadarn, ond hefyd yn eich dysgu sut i'w chymhwyso'n ymarferol, gan ddefnyddio enghreifftiau o'r byd go iawn, asesiad yn seiliedig ar sefyllfaoedd, a meddalwedd. Byddwch yn meithrin dealltwriaeth fanwl o sut mae arian a chyllid yn gweithio, a sut mae gwybodaeth ariannol yn cael ei chyfleu a'i chymhwyso. Byddwch yn datblygu eich llythrennedd ariannol eich hun, gan roi sylfaen gadarn ichi ar gyfer eich ffyniant ariannol personol yn y dyfodol. Yn ogystal â modiwlau ar agweddau meintiol y maes, mae’r Ysgol Busnes yn cynnig cyfle i chi astudio agweddau mwy ansoddol ar fancio a chyllid - er enghraifft: moeseg ariannol, cyllid personol, rheoleiddio ariannol, ac agweddau ar fancio a chyllid cynaliadwy.

Gall yr wybodaeth a'r sgiliau y byddwch yn eu datblygu ar ein graddau cyfrifeg, bancio a chyllid hefyd eich helpu i reoli eich portffolio buddsoddi eich hun yn well. Gallwch ddysgu sut i ddehongli gwybodaeth ariannol a dod yn fuddsoddwr craff a gwybodus. Rydym ni'n hoffi rhoi cyfle i fyfyrwyr yma ym Mangor gael rhai profiadau yn y byd go iawn, a gyda'n labordy masnachu ein hunain gallwn gynnig hyn. Yn y labordy masnachu rydym yn defnyddio meddalwedd efelychu arbenigol masnachu ar y farchnad stoc a gynlluniwyd i roi profiad ymarferol i fyfyrwyr o sefyllfaoedd sy’n efelychu beth all ddigwydd gyda chynilion personol a buddsoddiad.

Rydym yn falch o'n corff amrywiol o fyfyrwyr yma ym Mhrifysgol Bangor. Wrth astudio yn Ysgol Busnes Bangor, byddwch yn cwrdd â myfyrwyr o bob rhan o'r byd. Wedi eu dwyn ynghyd gan eu diddordeb cyffredin sef cyfrifeg, bancio, a chyllid, mae ein corff myfyrwyr rhyngwladol yn golygu y gallwn ni gynnig blas i fyfyrwyr o sut beth allai masnachu byd-eang fod yma yng ngogledd Cymru.

Mae llawer o’n myfyrwyr yn dilyn gyrfaoedd mewn maes cyffredin o fewn cyfrifeg, bancio a chyllid. Mae cwrdd â chymaint o fyfyrwyr o'r un anian yn eich galluogi i adeiladu rhwydwaith cryf a all helpu i greu cyfleoedd yn ddiweddarach yn eich gyrfa. Rydym yn annog ein myfyrwyr i gysylltu trwy LinkedIn a dechrau adeiladu eu rhwydweithiau proffesiynol o'r eiliad y cyrhaeddant.

Mae gan Ysgol Busnes Bangor gysylltiadau cryf â chyrff proffesiynol megis Cymdeithas y Cyfrifwyr Ardystiedig Siartredig (ACCA), Sefydliad Cyfrifwyr Siartredig Cymru a Lloegr (ICAEW), Sefydliad Siartredig y Cyfrifwyr Rheoli (CIMA), y Sefydliad Siartredig Gwarantau a Buddsoddiadau a Sefydliad y Bancwyr Siartredig. Mae ein cyrsiau yn rhoi sylfaen gref i ddilyn cymhwyster proffesiynol dilynol ac yn fodd o’ch eithrio rhag gorfod sefyll llawer o arholiadau proffesiynol, a fydd yn lleihau'r amser a gymer hi i chi gymhwyso. Gall y cymwysterau proffesiynol hyn helpu i roi mantais i chi mewn marchnad swyddi gystadleuol.